बीचे खोईर नागपुरी
(नवा डहर,
नवा जोश)
आयो- बाबा, भाई- बहिन!
रऊरे मन सब के जोहार, सादर प्रणाम।
कोनो (कउनो) भी नवा काम के सुरू करेक ले हमर नागपुरी समाज
में 'गोड़ लागेक' आउर 'सुमिरन' कर बहुते भारी महतव है। आईझ जब हम ई ब्लॉग कर माध्यम से रउरे मन से जुड़त ही, तो सभे
से पईहले उ ऊपर वाला आउर अपन पुरखा मनके गोड़ लागत ही। प्रार्थना खाली कोनो धरम कर
काम नी हके, ई मन कर ताकत हके। जब हम कोनो काम के नीक नियत आउर भगवान कर आसीरवाद ले के
सुरू करिला, तब हमर मन में एगो अजबे किसिम कर जोश आय जायला। कोनो भी नवा कोलम या नवा काम
कर सफलता उकर नीव पर टिकल रहेला। जदि नीव में प्रार्थना आउर मेहनत कर मिलाप होवी, तो
भविष्य जरूर उज्ज्वल होवी।
हमर नागपुरी भासा-संस्कृति कर भविष्य उज्ज्वल बनाएक ले हमरे
के संगे चलेक परी। जइसन सुरुज कर पहिली किरन अंधार के मेटाए देवेला, ओहे नियर
हमर साफ़ सुथरा विचार आउर प्रार्थना हमर डहर कर कांटा मनके हटाए देवेला। ई कोलम, जेकर नाम (नाव) “बीचे खोईर नागपुरी” राखल जात है, कर
माध्यम से हमर कोसिस रही कि हम आपन संस्कृति के नवा पीढ़ी तक पहुँचाब आउर सभे कर
मंगल कर कामना करब। मेहनत कर पसीना आउर भगवान कर भरोसा, इहे दु
गो चीज है, जे कोनो भी साधारण आदमी के असाधारण बनाय देवेला। आउ, आईझ ई
नवा सुरूआत संगे हम सभे आपन-आपन क्षेत्र में नाम कमाए कर आउर समाज के आगे बढ़ाय कर
संकलप लेईल। तो एहे संकल्प कर साथ आईझ 'बीचे खोईर नागपुरी'
कर माध्यम से हम रउरे मनक घर- आंगन आऊर दिल तक पहुँचत ही।
हमर नागपुरी समाज में 'खोईर' माने कि गाँव कर बीच कर डहर या चौक, उ जगह हके जहाँ सभे मिल-जुल के बइठयना, दुख-सुख
बाँटयना और भविष्य कर ताना-बाना बुनयना। कोनो भी नवा काम के सुरू करेक से पईहले
प्रार्थना और उज्ज्वल भविष्य कर कामना करेक हमर पुरखा मनक रीत हके। प्रार्थना खाली
हाथ जोड़ेक नी हके,
ई आपन भीतर कर बिस्वास के जगाएक कर एगो तरीका हके। जब हम
कोनो काम के भगवान कर भरोसा और नीक नियत से सुरू करिला, तब आधा
सफलता तो उहे मिल जायला। जइसन दीया बारेक से पईहले बाती और तेल कर जरूरत होवेला, उहे नियर
उज्ज्वल भविष्य ले कड़ा मेहनत आऊर भगवान कर आसीरवाद कर जरूरत होवेला।
'बीचे खोईर नागपुरी'
कर माध्यम से हमर कोसिस रही कि हम आपन भासा-संस्कृति कर जोत
के जगाए रखब। आईझ कर जुग में जदि हमरे मेहनत कर डहर में चलब और सभे कर भला सोचब, तो हमर
भविष्य जरूर उज्ज्वल होवी। ई कोलम हमर और रउरे बीचक एगो अइसन कड़ी बनी, जहाँ
हमरे मन आपन माटी कर महक के दुनिया तक पहुँचाब। आऊ, आईझ ई नवा सुरूआत संगे हम सभे आपन-आपन क्षेत्र में नाम
कमाएक कर आऊर समाज के आगे बढ़ाय कर संकलप लेईल। मेहनत हमर पहचान बनो आऊर प्रार्थना
हमरे कर ताकत।
परमात्मा सभे कर डहर सुगम करबयं। मंगल करबयं आऊर सभे के
उज्ज्वल भविष्य देबयं।
रउरे कर आपन-
अशोक “प्रवृद्ध”
लेखक, आध्यात्मिक चिन्तक व साहित्यकार
बीचे
खोईर नागपुरी,
ऊंची तकिया, मुरुनगुर
