कामदेव कर पूजा कर दिन हके अनंग त्रयोदशी
-अशोक
“प्रवृद्ध’
उत्कल मेल, रायपुर, दिनांक- 31 मार्च 2026
चैत महीना कर सुकल पख कर तेरस (त्रयोदशी) के अनंग तेरस कहल
जायला। अनंग, कामदेव कर ही एगो नाम हके,
एहेले ई दिन कामदेव कर पूजा करल जायला। कामदेव कर पूजा करले
मनुख कर रूप-रंग आउर सुभाव मनमोहक होय जायला। ऊकर में अइसन खिंचाव आवेला कि जे केउ
ऊकर से मिलेला, उ ऊकर परभाव में आय जायला।
अनंग तेरस के कामदेव कर पूजा करले विपरीत-सम्बन्ध (प्रेम
संबंध) में सफलता मिलेला। ई बछर 2026 में, चैत सुकल तेरस 31 मार्च दिन मंगर (मंगलवार) के पड़त हे, एहेले
ओहे दिन अनंग तेरस कर परब मनायल जाई। मानल जायला कि ई दिन महादेव, माता
पारबती, कामदेव आउर रति कर पूजा करले पिरीत गहिरा होवेला। ई दिन खास करके माया आउर
जोड़ा-जेंवरी (दांपत्य) जीवन ले भारी महतव रखेला। माया-बिहा (प्रेम विवाह) में आवे
वाला अड़चन मन दूर होय जायना आउर घर-संसार में मरद-मेहरारू के बीच नीक तालमेल बनल
रहेला। ई दिन कुछ खास उपाय करले जोड़ा मनक जिनगी सुख-सांति से भईर जायला। ईकर से एक
दिन पईहले चैत सुकल द्वादशी के मदन द्वादशी मनाल जायला। कामदेव के मदन नाव से भी
जानल जायला, से ले ई दिन भी कामदेव के हे समर्पित मानल जायला। पुराण मन में कामदेव
के माया (प्रेम) आउर काम कर देवता मानल जाला। उनकर रूप-रंग एकदम जवान आउर मनमोहक है।
ऊ बिहाएल हँय आउर रति उनकर मेहरारू (पत्नी) हकैं। ऊ एतना बलवान हँय कि उनकर ले
कोनो ढाल चाहे कवच कर बात नी करल जाय। उनकर दोसर नाम मन में रागवृंत, अनंग, कंदर्प, मनमथ, मनसिजा, मदन, रतिकांत, पुष्पवान
अउर पुष्पधंव भारी परसिद्ध हे। कामदेव,
माई लछमी आउर भगवान बिष्नु कर बेटा हँय। कृष्ण कर बेटा
प्रद्युम्न के कामदेव कर अवतार मानल जाला। हिंदू धरम कर वैष्णव मन, कामदेव
कर आध्यात्मिक रूप के कृष्ण भगवान कर ही रूप मानेना। कामदेव कर धनुष परकिति कर
सबले बेसी मजबूत चीज मन में से एगो हके। ई धनुष मनुख कर काम (इच्छा) में थिरता आउर
चंचलता नियर उल्टा गुन मन से भरल है। एहेले ईकर एगो कोना थिरता कर आउर दोसर कोना
चंचलता कर निसानी हके। बसंत,
कामदेव कर संगी (मीत) हँय, एहेले कामदेव कर धनुष फूल मन से बनल रहेला। ई धनुष कर डोरी
(कमान) ले कोनो आवाज नी निकलेला। ईकर मतलब ई है कि काम (प्रेम) में सालीनता आउर
धीरज जरूरी है। तीर,
कामदेव कर सबले बड़ हथियार हके। ई जेके भी बींधेला, ऊकर से
पहिले न तो आवाज करेला आउर न ही सिकार के संभलेक मौका देवेला। ई तीर कर तीन कोना
होवेला, जेके तीनो लोक कर निसानी मानल जायला। एकर में एगो कोना ब्रह्मा जी कर अधीन है, जे जनम
(निर्माण) कर निसानी हके। ई दुनिया के बढ़ाएक में मदद करेला। दोसर कोना बिष्नु
भगवान कर अधीन हे,
जे ओंकार
माने कि पेट भरेक ले होवेला। ई मनुख के करम करेक प्रेरणा
देवेला। कामदेव कर तीर कर तीसरा कोना महादेव कर अधीन हे, जे मकार माने कि मोछ (मुक्ति) कर निसानी हके। ई मनुख के मुकति कर डहर बतायला। काम
(सृष्टि) खाली दुनिया बढ़ाएक ले जरूरी नखे,
बल्कि मनुख के करम कर डहर बताएक आउर अंत में मोछ देवेक
रस्ता भी देखाएला। कामदेव कर धनुष कर निसाना विपरीत लिंगी (मरद-मेहरारू
कर खिंचाव) होवेला। एहे खिंचाव से बंध के पूरा दुनिया चलत हे। कामदेव कर एगो
लक्ष्य उ खुद हँय,
जेके पुरुष मानल जायला, आउर दोसर रति हँय,
जेके जनाना रूप में जानल जायला। कवच सुरक्षा कर निसानी हके।
कामदेव कर रूप एतना बलवान है कि जे ऊकर सुरक्षा नी करल जाई तो उ तबाही (विप्लव) लाय
सकेला। एहेले ई कवच कामदेव कर सुरक्षा ले बंधल है। मतलब ई कि सुरक्षित काम, परकिति
कर बेबहार ले जरूरी मानल गेल हे,
ताकि समाजीक बुराई आउर भयंकर बेमारी मन के दूर राखल जाय
सके।
कथा कर अनुसार जब राक्षस तारकासुर भारी उधुम (आतंक) मचाय
रहे, तब ऊकर बध ले देबता मन कामदेव से बिनती करलैं कि ऊ महादेव आउर पारबती कर बीच
मया (प्रेम) जगाय दें। कालेकि तारकासुर के ई बरदान मिलल रहे कि खाली शिव-पारबती कर
बेटा ही ऊकर बध कर सकेला। तब कामदेव आउर देवी रति, महादेव कर ध्यान भंग करे ले कैलास परबत गेलैं। कामदेव कर
बाण लागते महादेव कर ध्यान तो भंग होय गेलक,
मंतुक उ मने मने बहुते खिसियाय गेलैं। महादेव आपन तीसरा आँईख
खोईल के कामदेव के भसम (जलाय) कईर देलैं। आपन मरद कर मउत पर रति के बड़ खिस लागलक, आउर उ
पारबती के सराप दे देलक कि पारबती कर कोख (पेट) से कोनो बेटा जनम नी लेई। ई सराप
सुइन के पारबती दुखी होय गेलयं,
तब महादेव पारबती के समझालैं कि दुखी नी होवेक चाही, आउर फिर उमन
बिहा करलैं। जब देबता मन ई सराप आउर कामदेव कर भसम होवेक बात सुनलैं, तब उमन
भारी घबराय गेलैं। तब देबता मन छल से तारकासुर के ई बरदान दिलायलैं कि ऊकर बध खाली
शिव से जन्मल
बेटा ही कईर सकेला। पाछे महादेव कामदेव के फेर जिन्दा करलैं
आउर भगवान कार्तिकेय तारकासुर कर बध करलैं।
राष्ट्रीय नवीन मेल, रांची, डाल्टनगंज, दिनांक- 30 मार्च 2026
कामदेव कर रूप आउर उनकर शक्ति के बताएक ले ई अंग मन भारी
महतव रखेना।
फूल कर धनुष- ई माया आउर कोमलता कर निसानी हके।
फूल कर पाँच तीर- ई तीर मन मनुख कर पाँच इंद्रिय मन के जगाय
ले होवेना।
मछरी कर निसानी वाला झंडा (मकरध्वज)- ई उनकर पहचान कर
निसानी हके।
तोता कर सवारी- कामदेव सुगा (तोता) कर सवारी करेना, जे
चंचलता कर निसानी है।
बसंत ऋतु के कामदेव कर खास संगी मानल जायला।
पुरान कथा मन में कामदेव कर आँईख, भों
(भौं) अउर कपाड़ (माथा) कर बारे में विस्तार से बतायल जाय हे। उनकर आँईख मन के बाण माने कि तीर
कर दरजा देवल जाय हे। सरीर कर बनावट में आँईख कर मतलब ठीक
उनकर हथियार तीर
नियर मानल जायला। उनकर भोंह मन के कमान (धनुष कर
डोरी) कहल जायला। ई मन एकदम सांत रहेना,
मंतुक इसारा-इसारा में ही आपन सब बात कईह देवेना। इमन के
कोनो सहारा चाहे संग कर दरकार नी होवे। कामदेव कर कपाड़ धनुष नियर है, जेकर में
चंचलता भरल रहेला,
मंतुक उ पूरी तइर से थिर (स्थिर) रहेला। कपाड़ पूरा सरीर कर
सबले ऊपर कर हिस्सा हके,
जे मनुख के डहर (दिशा) देखाएला।
हाथी के कामदेव कर वाहन मानल जाय हे। हालाँकि, कुछ
सास्तर मन में कामदेव के सुगा (तोता) कर ऊपर बैठल भी देखाएल जाय हे, मंतुक
असल में हाथी के ही उनकर सवारी मानल जायला। परकिति में हाथी एके अइसन जीव है, जे चारो
कोइना (दिशा) में खुल्ला घूमेला। मसत चाल से चले वाला हाथी तीनो कोना देख सकेला आउर
पाछे से तनिक भी आहट आवेले संईभल जायला। हाथी आपन कान से हर बटे कर आवाज सुइन
सकेला आउर आपन सूँड़ से चारो बटे वार (हमला) कईर सकेला। ठीक अइसने कामदेव कर सुभाव
(चरित्र) भी देखेक ले मिलेला। ऊ खुल्ला रूप से चारो कोइना घूमेना आउर कोनो भी बटे
तीर छोड़ेक ले तइयार रहेना। कामदेव कोनो भी किसिम कर बोली चाहे आवाज के तुरते भांप
लेवेना।
कामदेव कर तीर कोनो लोहा चाहे काठ कर नखे, बल्कि
फूल मन से बनल हे। ई पाँच तीर मनुख कर मन आउर इन्द्रिय मन पर अलग-अलग असर करेना।
अरबिन्द (कमल) तीर मन में माया कर कोमलता आउर सुभाय जगायला।
अशोक तीर मनख के बिकल (बेचैन) कर देवेला आउर माया ले तड़प
पैदा करेला।
अम्बा (आम) कर मंजरी माने कि अम्बा फूल वाला ई तीर मन में
गहिर खिंचाव अउर सम्मोहन पैदा करेला।
नवमल्लिका (चमेली) तीर मन के सांत मंतुक माया में डूबल
राखेक ले होवेला।
नीलोत्पल (नीलकमल) तीर सबले गहिर होवेला, जे मनुख
के मया में पूरी तइर से मदमस्त (उन्माद) कर देवेला।
ई पाँच तीर मनुख के देखेक, सुनेक,
छुवेक,
सूंघेक अउर चखेकर इन्द्रिय मन के जगाय के माया कर एहसास
दिलायेना।
कामदेव कर पूजा कर घरी ई मंत्र कर जाप करले मनचाहा फल
मिलेला-
"ॐ कामदेवाय विद्महे,
पुष्पबाणाय धीमहि,
तन्नो अनंग प्रचोदयात्।"
अनंग तेरस कर पौराणिक कथा भी प्रचलित है। बहुते पुरान बात हके, जब सती
माता आपन देह त्याग देलैं,
तब महादेव (शिव) भारी दुखी होय के घोर तपस्या में लीन होय
गेलैं। ओहे बखत तारकासुर नाम कर राक्षस देबता मन के भारी दुख देवत रहे। ओके ई
बरदान रहे कि खाली महादेव कर बेटा ही ओकर बध कर सकेला। मंतुक महादेव तो तपस्या में
डूबल रहैं, एहेले देबता मन चिन्ता में पड़ि गेलैं। तब सब देबता मन मिल के कामदेव करा गेलैं
आउर उनकर से बिनती करलैं कि ऊ महादेव कर मन में माता पारबती ले माया (प्रेम) जगाय
दें। कामदेव आपन मेहरारू रति के संगे लइके कैलास परबत गेलैं। महादेव कर तपस्या भंग
करे ले कामदेव आपन पुष्प बाण
(फूल कर तीर) महादेव पर चलाय देलैं। तीर लगते महादेव कर आँखि
खुलि गेलक आउर उनकर तपस्या भंग होय गेलक। मंतुक कामदेव कर ई बेबहार से महादेव के
भारी खिस (क्रोध) लागलक। उ आपन तीसरा आँईंख खोललैं आउर कामदेव के तुरते भसम (जलाय) कर
देलैं। आपन मरद के भसम होते देख के रति लोर ढराय (रोने) लागली आउर महादेव से दया
कर भीख मांगली। रति कर दुख देख के महादेव के दया आइ गेलक। उ कहलैं कि कामदेव अब
बिना सरीर कर रहबै,
एहेले उनकर नाम अनंग
(बिना अंग वाला) होई। पाछे महादेव कहलैं कि द्वापर जुग में
जब भगवान कृष्ण कर जनम होई,
तब कामदेव उनकर बेटा प्रद्युम्न के रूप में जनम लेबै। जे
दिन कामदेव भसम होय के फेर अनंग
रूप में जियैत भलैं,
उहे दिन चैत सुकल तेरस रहे। एहेले ई दिन के अनंग त्रयोदशी कहल जायला। मानल जायला कि ई कथा के सुइने से घर-संसार में मया अउर सुख-सांति
बनल रहेला।
कोई टिप्पणी नहीं:
एक टिप्पणी भेजें